قصة الفتاة الذكية

في ملك .. سأل شعبه .. سؤال وقال اللي يجاوب عليه صح

راح اعطيه فلووس مرة كثيير وكل شي يبغاه

والسؤال .. ايش اكثر شي وايش اكبر شي ؟؟

راح الخادم .. على بيته وقاعد يفكر

جته بنته .. وقالت : ايش فيك ؟؟

الملك سأل الشعب سوال وقال اللي يجاوب عليه راح يعطيه فلوس وكل اللي يبغاه

وانا مو عارف الإجابة

البنت : ايش هو السؤال ؟؟

الخادم : ايش اكثر شي وايش اكبر شي ؟؟

البنت : روح عند الملك وقله أكبر شي أرضك وأكثر شي مالك

راح الخادم عند الملك وقاله : ياملك أنا لقيت إجابة لسؤالك

قال الملك : تفضل

الخادم : أكثر شي مالك و أكبر شي أرضك

الملك : مين قلك الإجابة ؟؟

الخادم : بنتي

الملك : طيب روح قلها

لابسة ومهي لابسة .. ماشية وماهي ماشية .. هدية ولا مو هدية ؟؟

الخادم راح عند بنته وقالها .. : الملك يقولك

لابسة وما هي لابسه .. ماشية وماهي ماشية .. هدية ولا مو هدية ؟؟

قالت البنت

طيب روح جيب لي شبكة .. وغنمة .. ولحمة

استغرب الأب الخادم من الطلبات بس راح وجابها

لبست البنت الشبكة وركبت الغنمة .. ومسكة اللحمة وراحت

ودخلت عند الملك .. وقالت :

ياملك .. انا لابسة شبكة ومو لابسة

وماشية بس مو على رجولي على غنمة

وهذي لحمة انت تعتبرها هدية ولا مو هدية

الملك .. أعجب بذكاء البنت وقالها تتزوجيني؟؟

أتزوجت بنت الخادم الملك .. وعاشو في سبات ونبات .. وخلفوا صبيان وبنات

المهم
بعد سنين .. كان في خادم من الخدم أعطاه الملك حصان هدية

وفي يوم نام الخادم ونسي إنه يأكل الحصان قام هاج الحصان

فجأه الملك وطرد الخادم وقاله هات الحصان ورووح .. راح الخادم وهو زعلااان

المهم شافته الملكة .. وقالتله ايش فيك .. قالها:

الملك طردني واخذ مني الحصان

قامت قالت له : خذ سنارة واقعد اصطاد بالحديقة على العشب

ولو جاك الملك وقالك ايش تسوي قله غذا انت مارزقتني يمكن ربي يرزقني

سوا الخادم زي ماقالتله الملكة

جاه الملك .. وقاله ايش قاعد تسوي ؟؟

الخادم :إذا أنت مارزقتني يمكن ربي يرزقني

قام الملك قاله : مين قلك تقول كذا

الخادم : الملكة

عصب الملك .. وطفش من ذكاء البنت ..وراح لها .. وقالها :

شوفي يابنت الناس .. لمي أغراضك وروحي على بيت أهلك

بس قبل ماتروحي .. سويلي شاي .. وخذي أغلى شي عندك

المهم .. قامت البنت سوت له شاي وحطت له فيه منوم

المهم صحي الملك .. ولقى نفسه في بيت الخادم ( أبوالبنت )

قام قال : ايش اللي جابني هنا !!

البنت : مو أنت قلت لي روحي بيت أهلك وخذي أغلى شي عندك !!

وأنت أغلى شي عندي