قصص الحب

موضوع: قصص الحب الثلاثاء 17 يونيو 2008, 4:07 pm

أبطال القصة
- حسن نيرمين
تبدأ القصة في ميني باص
في يوم من الايام كانت نيرمين خارجة مع بنت خالتها نازلين يشتروا شوية حاجات وهما راكبين الميني باص بنت خالة نيرمين لفت نظرها شاب راكب في الميني باص ومتنح لهم المهم كبروا دماغهم وكملوا كلام لحد ما الميني باص وصل للمنطقة اللي ساكنين فيها في مدينة نصر بس اكتشفوا ان الجدع اللي كان متنح لهم في الميني باص ماشي وراهم وبرضه كبروا دماغهم ودخلوا علي البيت

مرت حوالي ساعة كاملة وبعدين بالصدفة بنت خالة نيرمين واقفة في البلكونة لقت الاخ اياه واقف في الشارع ومتسمر قدام البيت المهم ندهت لنيرمين وقالت لها تعالي شوفي اللي واقف تحت ده وطبعا استغربوا جدا ايه اللي موقفه هنا ده

بعد مباحثات ومداولات بين البنتين قرروا يستكشفوا ايه الموضوع (بنات دماغها طقة)
المهم نزلوا الشارع علي انهم رايحين يشتروا حاجة والاخ اياه جت له الجرأة وراح كلم الانسة نيرمين وقال لها انا معجب بيكي وعايز اتقدم لك
بالطبع سألته انت مجنون ولا ايه هو انت تعرفني قالها انا اول ما شفت عنيكي حسيت اني اعرفك من زمان
المهم اتعرفوا علي بعض واعجبوا ببعض واتفقوا ان الاخ اياه يروح يتقدم لها لكن فيه بعض المشكلات
1- الاستاذ حسن معاه دبلوم صنايع ونيرمين معاها معهد خدمة اجتماعية
2- الاستاذ حسن لسه في الجيش بيأدي الخدمة العسكرية ونيرمين مخلصة الدراسة
3- طبعا الاستاذ حسن ابيض يا ورد معهوش اللضا
4- نيرمين اكبر من الاستاذ حسن بكام شهر
5- نيرمين ابوها شهيد واعمامها اللي ضابط جيش واللي مستشار واللي تاجر -وعيلة حسن يا عيني ناس علي اد حالهم

المهم نيرمين بدأت تمهد الموضوع في البيت وحكيت لامها واخوها الكبير وطبعا قامت حريقة في البيت ازاي واحد زي ده يتقدم لك وده بيضحك عليكي ومستحيل نوافق عليه وانتي اتهبلتي ولا ايه
(البنت يا عيني اتبهدلت واتمسح بكرامتها الارض) المهم اخوها قال قولي له ميجيش احسن له
طبعا الاستاذ حسن بيحب نيرمين ومش ممكن يستغني عنها وبعد ما عرف الكلام اللي حصل ده كله قرر انه يروح يتقدم لها
راح اتقدم لها والناس قابله وبوزهم مقلوب لولا
انهم يعرفوا الاصول مرضوش يمسحوا بكرامته الاراض هو كمان وقالوا له بالزوق مرفوض
المهم الراجل مشي وفضل يزن علي ودان الناس شوية والبنت من ناحيتها 3 أو 4شويات وفعلا هي اللي كان ليها الدور الرئيسي لانهم يوافقوا (بيقولوا البنت لو عايزة تعمل اي حاجة محدش يقدر يمنعها)
المهم البنت عاشت ايام سودا مايعلم بيها الا ربنا لدرجة ان اخوها رفع عليها في يوم السكينة وقال ورحمة ابويا ما هي متجوزاه (بصراحة هو كان 30راجل صعيدي في بعض)
مرت الايام واهلها وافقوا انهم يتخطبوا علي اساس ان البيه مش هيعرف يعمل حاجة وكان فاضل له سنة ويخلص الجيش واتفقوا بعد سنة الجيش بسنة كمان الدخلة ومش هنطول عن كده والا كل واحد يروح لحاله

القصة مخلصتش كده لان الغلبان مطلوب منه بعد ما يخلص الجيش بسنة يجيب شقة ويفرشها ويكون جاهز علشان يدخل وهو زي ما قلت لكم ابيض يا ورد
بدأت هنا قصة كفاح الحبيبين بقي ينزل اجازة الجيش ويروح يشتغل وهي كانت بتشتغل في مكتب كمبيوتر وبقوا يحوشوا مع بعض
مكنش بينزل الاجازة وياخدها يفسحها كانوا بيكتفوا يتمشوا علي النيل ويشربوا واحدة بس حاجة سقعة علشان يوفروا فلوس علشان يعرفوا يبدأو حياتهم وبنوا هما الاتنين بيتهم طوبة طوبة
فعلا بنوه طوبة طوبة لان ابو حسن
قاله ممكن تبني دور فوق البيت وتسكن معانا في البيت
(ده كان بيت العيلة وكان في المرج وخلي بالكم نيرمين كانت ساكنة في مدينة نصر)
المهم سنة الجيش خلصت وقبل السنة اللي بعد الجواز كان حفل زواج نيرمين وحسن وهما دلوقتي عندهم 3 أولاد اكبر واحد عنده حوالي 10 سنين

اما حسن فبقي واحد من اهل نيرمين لدرجة ان اخوات نيرمين وامها ميقدروش يستغنوا عنه وبقي اخ ليهم وزي ما تقولوا مدير اعمالهم في مصر لان اخوات نيرمين كلهم متغربين

موضوع: رد: قصص الحب الثلاثاء 17 يونيو 2008, 9:53 pm

merciiiiiiiiiiiiiiiiiii

موضوع: رد: قصص الحب الأربعاء 18 يونيو 2008, 3:54 am

يعطيك العافية

موضوع: رد: قصص الحب الأربعاء 18 يونيو 2008, 9:27 am

شغال تمام